Արդեօք Հայաստանի Ժողովուրդը Վերջապէս Պիտի Արթննա՞յ, Երբ Փաշինեանը Հրամայէ Ձերբակալել Կաթողիկոսը

Յարութ Սասունեան
www.TheCaliforniaCourier.com

Հայաստանի վարչապետ Նիկոլ Փաշինեան վերջին ամիսներուն կը փորձէ ճնշում
բանեցնել Ամենայն Հայոց Գարեգին Բ․ կաթողիկոսին վրայ` ստիպելով զայն
հրաժարական տալու, այդպիսով խախտելով Հայաստանի սահմանադրութիւնը, որ
կ՛արգիլէ պետական պաշտօնատարներուն միջամուխ ըլլալ Եկեղեցւոյ ներքին
գործերուն:
Երբ կաթողիկոսը մերժեց հրաժարական տալ, Փաշինեան գտաւ զայն հեռացնելու
այլ միջոց մը` օրինականութեան քողին տակ: Ան այժմ յառաջ կը քշէ կեղծ
պատրուակ, թէ կաթողիկոսը խախտած է Հայաստանի օրէնքը`
հոգեւորականներուն կոչ ուղղելով մասնակցիլ հակափաշինեանական բողոքի
ցոյցի: Սակայն այս մէկը չի կրնար յանցագործութիւն նկատուիլ, ընդհակառակը,

ասիկա պաշտպանուած խօսքի ազատութիւն է, որ ժողովրդավարութեան
հիմնասիւներէն մէկն է:
Վերջերս Փաշինեան խորհրդարանին մէջ յոխորտաց, թէ քանի որ ժողովուրդը
չ՛ապստամբիր իր քաղաքականութեան դէմ, ուրեմն համաձայն է իրեն:
Իրականութեան մէջ Հայաստանի մէջ անոնք, որոնք կը բողոքեն կամ կը
հակադարձեն անոր, կ՛արձակուին իրենց աշխատանքէն, կը ձերբակալուին եւ կը
բանտարկուին, իսկ սփիւռքի ընդդիմախօսներուն Հայաստան մուտքը կ՛արգիլուի։
Փաշինեան նախ կը լռեցնէ զանոնք, ապա կը յայտարարէ, թէ ժողովուրդը
կ՛աջակցի իրեն: Ա՛յս է այն «ժողովրդավարութիւնը», որ ան բերած է
Հայաստան:
Փաշինեան կը մոռնայ, որ հայ ժողովուրդին աւելի քան 90 տոկոսը՝ թէ՛
հայրենիքի եւ թէ սփիւռքի մէջ, Հայ առաքելական եկեղեցւոյ հետեւորդ է, ինչ որ
կը նշանակէ, թէ Եկեղեցւոյ միլիոնաւոր աջակիցները մեծապէս կը գերազանցեն
անոր նուազող աջակիցներուն թիւը:
Վերջին ամիսներուն Փաշինեան հրամայած է ձերբակալել երկու
արքեպիսկոպոսներ, բարերար Սամուէլ Կարապետեանն ու քանի մը այլ անձեր՝
կեղծ մեղադրանքներով: Այս ամսուան սկիզբը Միքայէլ արք. Աջապահեան
դատապարտուեցաւ երկու տարուան բանտարկութեան` յեղաշրջման կոչ ուղղելու
մեղադրանքով: Նախորդ շաբաթ Փաշինեան ձերբակալեց նաեւ Արագածոտնի

թեմի առաջնորդ, կաթողիկոսին զարմիկ Մկրտիչ եպս․ Պռօշեանը, ինչպէս նաեւ
տասնեակ հոգեւորականներ եւ աշխատակիցներ` եկեղեցական գոյքի եւ անոնց
տուներու խուզարկութիւններէն ետք: Մեղադրանքը հիմնուած էր դժգոհ
հոգեւորականի մը յայտարարութեան վրայ, իբր թէ եպիսկոպոսը կոչ ուղղած է
իրեն մասնակցելու 2021-ին Փաշինեանի դէմ կազմակերպուած հանրահաւաքին:
Այս ձերբակալութիւններուն նպատակն է վախցնել ուրիշները, որպէսզի անոնք
ալ չյանդգնին ընդդիմանալ Փաշինեանին:
Հայ առաքելական եկեղեցին դատապարտեց նախորդ շաբաթուան ապօրինի
ձերբակալութիւնները` կառավարութեան գործողութիւնները որակելով որպէս
«բռնաճնշումներ Հայոց եկեղեցու դէմ» եւ զանոնք բաղդատելով «բնորոշ
ամբողջատիրական համակարգերու» հետ: Քանատայի, Միացեալ Նահանգներու
Արեւելեան եւ Արեւմտեան թեմերու երեք առաջնորդները միացեալ
յայտարարութեամբ քննադատեցին Հայաստանի կառավարութիւնը` եպիսկոպոս
Պռօշեանի ձերբակալման համար եւ իրենց աջակցութիւնը յայտնեցին
կաթողիկոսին:
Յառաջիկայ տարուան յունիսին նախատեսուած խորհրդարանական
ընտրութիւններու նախօրեակին վարչապետը բացայայտօրէն կը փորձէ վերացնել
հնարաւոր մրցակիցները եւ մաքրել քաղաքական դաշտը հակառակորդներէն:

Հայաստանի մէջ դատարանները անկախ չեն կառավարութենէն, դատաւորները կը
գործադրեն Փաշինեանի հրահանգները: Պէտք չէ մոռնալ, որ 2018 թուականին
իշխանութեան գալէն ետք Փաշինեան ամբարտաւանօրէն յայտարարեց. «Կա՞յ
տենց դատաւոր, որ իմ ասածը չանի»:
Վատթարացնելով իրավիճակը` Փաշինեանի շրջապատը կոչ ուղղեց
կառավարութեան՝ ձերբակալելու Ռոպըրթ Ամսթըրտամը` Միացեալ
Նահանգներու մէջ գործող յայտնի միջազգային փաստաբանը, որ Հայաստան կը
գտնուի Սամուէլ Կարապետեանը պաշտպանելու համար: Ամսթըրտամ
յայտարարեց. «Մենք պիտի շարունակենք մեր յարձակումները Հայաստանի վրայ,
մինչեւ որ ազատ չարձակուի Սամուէլ Կարապետեանը»: Աւելի ուշ ան
պարզաբանեց, որ խօսքը միջազգային իրաւական եւ քաղաքական ճնշման մասին
է, եւ ոչ՝ ֆիզիքական գործողութիւններու: Միեւնոյն ժամանակ Հայաստանի
կառավարութիւնը նախորդ շաբաթ ձերբակալեց Ալեքսանտր Քոչուպայեւը`
բանտարկուած Բագրատ արք․ Գալստանեանի փաստաբանը` դատական
համակարգը քննադատելուն համար: Իրաւաբաններու միջազգային
յանձնաժողովը խստօրէն դատապարտեց անոր ձերբակալութիւնը:
Կառավարութեան հակաեկեղեցական գործողութիւնները, կարծես, նախերգանք են
կաթողիկոսին դէմ քրէական մեղադրանքներ առաջադրելու` զայն աւելի հլու
հնազանդ հոգեւորականով փոխարինելու համար: Միեւնոյն ժամանակ

ազրպէյճանցիները կ՛ողջունեն բարձրաստիճան հայ հոգեւորականներու
ձերբակալութիւնները` զանոնք կոչելով «վրէժխնդիրներ»: Ազրպէյճանական
յարձակումները Հայոց եկեղեցու վրայ կը գլխաւորէ Ազրպէյճանի հոգեւոր
առաջնորդ Ալլահշուքիւր Փաշազատէն:
Վարչապետ Փաշինեանին պատկանող «Հայկական ժամանակ» թերթը նախորդ
շաբաթ հրապարակեց 2023 թուականի հեռաձայնային զրոյցի մը
ձայնագրութիւնը՝ կաթողիկոսին նախկին գաւազանակիրին եւ Նաթան արք․
Յովհաննիսեանի միջեւ, որ կը քննարկուի կաթողիկոսին կողմէ
հոգեւորականներուն վրայ գործադրուած ենթադրեալ ճնշումը` մասնակցելու
Փաշինեանի դէմ կազմակերպուած հանրահաւաքին:
Այդ ձայնագրութեան հրապարակումէն ետք կառավարութեան քննչական կոմիտէն
յայտարարեց, որ յարուցուած է «քրէական վարոյթ»:
Կ՛ուզեմ երկու դիտարկում կատարել.
1.- Քանի որ այս հեռախօսի զրոյցը ձայնագրուած է 2023 թուականին, ինչո՞ւ
կառավարութիւնը զայն երկու տարի պահած է եւ միայն հիմա անիկա կը
հրապարակուի։ Պատասխանը պարզ է` սպասած է ամենայարմար պահուն`
հեռաձայնային զրոյցը օգտագործելու կաթողիկոսին դէմ իբրեւ ապացոյց։

2.- Ոեւէ մէկուն հեռաձայնային զրոյցը գաղտնօրէն ձայնագրելը անօրինական է:
Ես տեղեակ չեմ որեւէ դատարանի որոշման մասին:
Եթէ մօտիկ ապագային կաթողիկոսը ձերբակալուի եւ բանտարկուի, արդեօք
Հայաստանի ժողովուրդը վերջապէս պիտի արթննա՞յ եւ պիտի պաշտպանէ՞
Եկեղեցին, թէ՞ պիտի մնայ իր ինքնակամ մահաքունին մէջ:

Անոնք, որոնք կոչ կ՛ուղղեն հայերուն ձեռնպահ մնալու որեւէ գործողութենէ եւ
սպասելու յաջորդ տարուան խորհրդարանական ընտրութիւններուն, կը վտանգեն
Հայաստանի գոյութիւնը։
Բոլոր անոնք, որոնք այժմ կը խախտեն օրէնքները եւ հակահայ գործունէութիւն
կը տանին, պէտք է քրէական պատասխանատուութեան ենթարկուին եւ պատժուին
Հայաստանի յաջորդ հայրենասէր կառավարութեան կողմէ։